Lazarić: Damir Kajin je sam sebe poslao na smetlište povijesti

San uti ništo napisat za Istarski.hr, ma se mi se je va glovi zmutilo, čuda je tega ča se okoli nas trefilo i kako izvuć baš najfriškije? Oni put se je jovi Naš Kajin i po n-ti put pravi ki je va Istri najvažniji. Uti bi Kajin bit Župon, ma vidi vraga. Do sada je bi sabornik, penzioner, dežurni antifašista, da te manje funkcije i ne spominjen, a sada bi Kajin uti bit i župon istrijonski.

Kako velu guzicu ima ti čovik, kad bi uti na tolike kantrige sedit? Bit će da je on celi jena vela guzica, za ku robi toliko kantrigah. Je pozva da mu jenu krvovu spužvicu na kantrigu stavi i som Milanović. Ovi moderni puritanci biju rekli da bi uti i ovce i novce, a mi po starinski rečemo, da bi Kajin uti bit i jeben i pošten, a to ne gre i Boh!

Kajin išće potporu od „kosturi“ 

Do sada je Damir sebe vajka predstavlja kao principijelnega političara, čovika zi naroda, velega Istrijana i IDS-ovca, a bi je celo vime i najjači glos IDS-a i njigov najveći bašton i najveća metla. Kolike „disidente“ je samo Kajin počisti i okrpa, kad su se u nikoj dosta banalnoj stvori našli na niken drugen puti, od onega kega je službeno IDS zastupa. Sada na jedan put je Damir okupi sa ta „ološ“, se ke je do sada na stotinu puti „nogira“ i s njimi sada misli još jedan put „pokorit“ Istru.

Kako to Damir misli kambijat IDS z ljudi ke je kroz celo jeno vrime IDS pohita vonka zi stranke, a va seh teh procesih je Kajin bi alfa i omega ključnih razlaza i kako san reka i najveća metla i najbolji bašton. Domišlja me to na jedan poziv omraženega Yu-političara s prostora nekadašnje države, ki je govori o institucionalnom i vaninstitucionalnom djelovanju… Čuli smo već da je Kain ubi Abela, aš ovi ni uti poć va IDS, sada vidimo da su se te žrtve bile uzaludne, aš Kajin išće „kosture“ za povratak i potporu. Kasno je Damire „mrtvaci“ ne  moru više pomoć.

Damira san rada posluho kad je govori va Sabori, samo bin bi rada da je po tim pravilima živi kad se je torno va Istru. Ali vraga, on je vajka pravila postavlja za seh okoli sebe, a za njega je valjalo vajka ništo drugo. Domislimo se samo kako je na jedan don šo va pinžijon. Ne govori se to da bin Nineta proglasi svecen, dugo san ja od tega, samo bin uti da si mi malo otpremo oči i da malo manje u buduće verujemo lipin besedami, a baš po svojimi govorancijami je Kajin posta najpopularniji Istrijon. Se je pokozalo da je laglje lipo govorit, nego dobro delat.

Meni se paro da je Damir ovi put zgubi živce, do sada san kapi da već dugo vrimena nima kompas – sada je još i zgubi živce. Bilo ga je interesantno ponekad čut, a sada je som sebe poslo na „smetlište povijesti“. Dokle ovo finjivan još i čujen da ni nanke priša na sjednicu  „Glavnog stana“ stranke od kega išće potporu. Adio Damir, Boh daj dugo, dugo uživa ti meni u saboskoj penziji. Sabornik, penzioner, kandidat za župona Damir Kajin, bi rekli alkari, je pogodi VA NIČ!

Kajin kao Mamić

Istra je jedina županija ka još ni, nanke pokle dvajset let demokracije, šla vonka zi jednoumlja. Reka bin da nanke jeno jednoumlje ni rivala kambijat z drugen, nego je zustalo vajka sejno, čak se ni ljudi puno nisu kambijali. Niki su na vrime samo kambijali samo kolur i storili su to na vrime i tako su se te leta zustali na vlasti. Shvatili su da je to niko novo vrime i su se prilagodili. Triba se z vrimenon akomodavat, triba biti virtuoz, je govori stori pametni Pomet, a puno današnjih moćnika po  njigovin pravilima žive.

Koliko god je Kajin zadnjih dnevih malo razigra političku scenu Istre, njigov tir je šo va prozno i som sebe je pretvori samo va još jenega utopljenika. Moga bi na kraju formirat novu stranku SIG, ča bi značilo Stranka istarskih gubitnika. Neka mi škužo, ali z ovin lavežon i davežon mi se više sliči na Mamića, a o Mamiću nebin troši nanke jenu besedu.

Damir, škužoj forši ja kako davno otpisani i niman pravo na komentar, ma sada si i ti gotof! Napiši doma da je propalo se i zami si tvoju penziju, ne mislin to ni najmanje zlonamjerno. Penzija će ti bit najmanje pet puti veća od moje, ako je dočekan, iako san dela čuda, čuda let više nego ti, iako san bi pront za poć va školu kad si se ti rodi – ja još moran fato delat nikih jedanajs let za pet-šes puti manju penzijicu, ne zobi.

Zafoli Bogu ča si bi „na mesti“ ko je Boh joko blagoslovi, naruči jenu lipu kantanu mašu i nasmiji se konačno malo. Vajka si jodan i vajka se na nikega jodiš, a viš – nisi ni ti baš niki svetac. Našlo bi se i tebi kakov grih, samo nećeš na spoved, a druge spovidivaš i pozivaš na red šempre.

Dvo Milanovića

Istrijani su o Milanoviću vajk lipo govorili, imo je niko povlašteno mesto va pameti sakega iskrenega Istropatriota. Iako u vrime, kad njegova profesija i ni bila baš popularna, imo je dr. Božo joko čuda štovatelja va Istri, ali i šire, kako to znoju danas reć. Zno je prosudit ča je narodno, istarsko i ča je u narodnom i istarskom interesu. Mons. Milanović zno je kadi je granica med nacionalnim i religioznim i zno je ke se stori ne pobiru va sejnu košaru.

Va njigovo vrime o Dajli nanke Tito ni govori preveć, koliko ja znon. Sada baš Milanović nudi samostan, kega su već provali i pred Papu bronit i naš biškup Milovan, i mons. Jakovljević - moje poštovanje na Njihovoj žrtvi.

Mi pak živimo va niko divo vrime, kad smo svidoki da se bezbožnik poziva na Bibliju, citira je i kune na nju – adio pamet, narode moj. Kako Milanović misli Istrijanon kompenzirat Dajlu, ako se to uopće more konpenzirat, nisan ču. More bit z Rockwoolon i Plominon 3. Mislin da nike konpenzacije neće i ne more ni bit, stori je to samo za „ljubav Evrope“. Milanovićeva „prodaja“ Istre mi joko sliči na ono kad je Antanta z celu Istru plotila Toliju kad je va prvoj vojski kambijala bondu. Istra je još jedan put poslužila samo kao munida za plotit dobru volju, ovi put, Ujedinjene Evrope – nabijem je na k…! Milanović ima još samo jedon korak va prozno, a to je podržat Kajina, nadan se da će i to storit, pa da se i s njin pozdravimo.

Ja, da nebi bilo zabune, Milanović i Milanović nikako ni propijo sejno bit. Jedon se je škrbi za svoj kroj i za svoje ljude, ljudi su ga cijenili, a poštuju ga i danas 32 leta pokle je umra, poštivat će ga sigurno i u buduće, uz njegovo prezime piše obično mons. dr. Božo.

O onen drugemu Milanoviću, ki se va naše vrime rashićiva s ponoson i bogatstvom Istre, neću nič reć grdo, aš je donesa zakon po ken bi mi moga reć da san ga ofendi, oni put  meni kukulele…, a pofolit ga nima zoč, da mi ne zamirite. (Klaudijo Lazarić)