Čačić Prvi i Milanović Drugi

Pomajić misec nan je donesa čuda tega interesantnega. Teplinu – konačno, pokle one joke i duge zime. Samo ta teplina je fato na čuda ljudi djelovala čudno. Na nas mole ljude ni toliko nanke važno, ma i naši batići se zadnje vrime čudno ponašaju, baren se meni tako vidi.

Kad san reka batići, oni put zajno mislin na našu Vladu, to su najvećei batići poli nas, da ne rečen - Maca! Kadi Maca udre, tu trova ne roste, a va našoj Maci je alora pala i prva ostavka… Imali smo kroz celi misec Čačić show ki se nsatavlja kako one žajfenice (sapunice) na našoj dalekovidnici… Imali smo dvi vele manifestacije turizma - zagrebački i splitski Pederfest...

Ma uti bin najprvo razjasnit ki je ki va našoj Maci. Čačić je reka da je baš on Prvi, alora je Milanoviću pusti se druge broje, pa moremo slobnodno reć, Čačić Prvi i Milanović Drugi. Milanoviću je šćeto zustalo malo mesta za manoru doma, pa uz njegovo ime obično pišemo premijer, to kako zvuči evropski, to bi bila figura za vonka. Tu doma je Čačić sin reka da je on prvi i to nan saki don pokaživa i dokaživa. Ki njemu stane na rep, ta se more pozdravit i spakovat valiže. Kad on reče da je nika tamo studija za niku eletranu amaterska, ona se zajno hiti va koš. Kad reče da je ta i ta ministar slabo kapi, pa i slabo reka i brižnemu narodu do malo nade, finjena je štorija, pa zvo se ta ministar (ili batić) anke Slavko Linić, ki je poznat da ne more joko mučat. Za se druge va Maci, su rekli, da su stavili niku šteku dosta visoko, verujen da je to samo zato, da se Čačić Prvi more spoda provuć, aš mi ne spodobi da bi on  moga joko skokat. Jena ministrica je provala malo sforcat i skočit višlje, ma je dobila žgambetu i su je poslali na „smetlište povijesti“.

MACA I PEDERFEST
Saka država ima svoje znamenitosti, saka država ima nike svoje festivale, pa i ova naša Hrvocka ima potribu za ništo takovo. Let i let je, rečimo, Split bi poznat po svojen festivali  „lakih nota“, čak je bi jeno vrime mednarodni. Zagreb je bi poznat po svojen festivali šansona, pa po svojen velesajmi … Sada su prišla nika nova vrimena, ka nose nike nove ideje, bimo rekli, pušu niki novi vetri. Najveć sega novega priduje zi zapada, zi vele i demokratske nam budućnosti – zi Evrope. Tako su pomajića miseca i va Zagrebi i va Spliti održane dvi vele manifestacije, dvo vela festivala – najprvo va Spliti, pa drugu subotu zajno i va Zagrebi održan je veličanstveni Pederfest. Na obe dvi manifestacije prikazani su evropski dosezi, ke smo i mi z obe ruke prihvatili, na ponos cele nan Hrvocke. Naša Maca je podržala Pederfest, ča je i normalno, pa ona je proevropski orijentirana. Na splitsken Pederfesti je bilo čak pet ministri, a naša ministrica za vonjske stvori je bila oduševljena i nan je rekla, da va jedinoj  drugoj državi va Evropi ni bilo toliko ministri na jenen Pederfeti. Bravo naša Maca. Joč samo čekan da ovo iskoristi Hrvatska turistička zajednica, pa da na saken turističken sajmi i na saken našen graničnen prelazi osvanu plakati s natpison: Hrvocka – pederska destinacija!

Čačić Prvi ni bi na splitsken Pederfesti, to mu je poli mene veli minus – mislin da mu je tamo mesto i njemu i njegoven zamjeniku Milanoviću Drugemu. Ako ste već ta festival podržali, ni to smilo bit samo deklarativno, pa šetajte malo ljudi med svojim simpatizerima i obožavateljima, nemojte na raju gledat tako zi visokega.

ROHATINSKI
Rohatinski ni peder, to je očito. To govori o njegovoj nazovi proevropskoj orjentaciji, ka je s tin postala više nego upitna. Na sriću njemu pomalo ističe mandat, ali imo je čovik još ambicija bit i dalje va Narodnoj banki. Kako čujemo, nazva ga je Milanović Drugi i reka mu da se ritiro, da mu ga je dosta gledat. Verujen da su ga ovi iz Mace, ako ih moremo zvat, Macani – očekivali na splitskoj rivi ili kako su to niki nazvali, Pride. Pride Rohatinski vamo, pride tamo, a na splitski pride ni priša, alora upitna ti je evropska orijentacija, moj guverneru!

HOLY
Nanke Mirela Holy ni peder, sad san sigur. Ni je bilo ni va Split pride, ni va Zg pride. Ne pride Mirelica na pride i nju nazove Milanović Drugi i njoj reče da vonju nima više povjerenja. Brižna Mirelica je morala spakovat valižu i poć „trbuhom zad kruhom“. More bit da je ona i prez onega „pride“ imala minus poli šefa Čačića Prvega i ćakule govore da se je zato morala maknut. Sejno, zustala je vjerna vođi i partiji i poli Stankovića u Nedeljom u 2 onako va krvovo obučena -  izgledala mi je super. Ne zamirite mi, ma meni je sejno bilo lipče gledat nju, nego njenega nasljednika, za posluhat ih ionako nima smisla, govore i ponavljaju ča partijski šefovi milsiju. Saka vijest ka iz Mace more poć vani mora reć Prvi, a ku besedu reče i Drugi, baren onako protokolarno nan ki put ništo priopći.

Ovi put poli Stankovića, ja san ipak posluho ex ministricu, i gleda je – se kapi. Mislin da je djelovala onako mirno i da je, va tu uru vrimena, rekla čuda tega i direto i onako malo med redi. Mi je spodobilo, kako da njoj je niki veli kamik po zi srca, da se je ničega liberala. Mi se vidi da je ženska mislila z svoju glovu va Maci, a to njoj je bi veli, veli grih. Mi se vidi da je nikemu joko stala na žulj. Kemu – pogodite somi. Dobro, dobro, da me ne bite krivo tumačili, prihvaćam da Mirela Holy ni peder i da je zato morala poć zi Mace.

SINDIKATI
Sidikalni batići su nas navadili da hi gledamo na čelu sake kolone, ki god se va ovoj našoj državi buni i prošeće po česti, eko hi sindikati na čeli kolone. Oni rada šeću, to njin je nika vrsta rekreacije, to bi bi moj zaključak. Nisu ovi put šećali i na St-pride, ni na Zg-pride, jednostavno na pride - nisu prišli. Reka bin da je to joko prezobrazno. Ćorak, zatajili su kadi san hi najviše očekiva. Ja njin više ne verujen.

Jedan put su vapili „kruha, rada i slobode“, sada biju najraji to podiljili – da kao sebi nebi zeli previše. Sada su vidili da se z delon jedini ni pomoga pa samo škvičiju okoli, kakao srake. Mislin tu samo na te sindikalne vođe, sakako – sitna raja je i za njih „stoka sitnega zuba“. Oni biju na se kraje stiskali pos, samo nikako od svojih brageš. Ribić bi moga već navadit se ribu lovit, a ne samo pitat i pitat da mu doju ribu. Pak na kraji je reka, da su sidikati doli državi više od četiri miljarde kunic. Bože moj, neka doju još stoičetire, ako su već toliko puni šoldi. Samo tega ni va Evropici, bi mora i on znat. Mi se vidi da Ribić & Co samo zimaju od Države, pa mi nisu nanke malo uvjerljivi, a po meni bi i batići sindikalni morali svojemu puku objavit kolike su njihove ploće, a i zoč hi ni bilo na Pederfestu! (Klaudijo Lazarić)